Izintokazi ezincane ezinebhizinisi lokucwala zivule ngomklomelo ozobeka ibhizinisi kwelinye izinga. Omunye wazo uxoxe noTEBOGO MOKWENA

BAQALE ibhizinisi labo ngonyaka odlule benamaphupho amakhulu okukhula. Amaphupho lawo abawabona esezofezeka njengoba besanda kudla umhlanganiso emklomelweni wosomabhizinisi abasafufusa ohlelwa yiHhovisi likaMengameli iPresidential SMME Awards.

UNks uGugu Nonjinge uwomunye wabanikazi be-Asana Beauty yaseWoodstock, eNtshonalanga Kapa. Le ndawo iwine umklomelo webhizinisi elisafufusa eliphethwe yintsha iYouth-led SMME of the Year Award ebihamba noR100 000.

Uthi ukunqoba kuzosiza yena nomlingani wakhe benze izinguquko ezidingekayo ebhizinisini labo lokucwala izinwele, i-Asana Beauty. Ubambisene noNks uNomahlubi Hewu enkampanini.

Utshele iVutivi Business News ukuthi bazosebenzisa imali ukulungisa ezinye zezinkinga ezibavimbe ukuthi bakhule ngendlela abafisa ngayo.

Uthi bebengalindele ukuthola lo mklomelo, obekungowabo wokuqala. “Besingalindele ukuthi sizonqoba njengoba besiqhathwe nezinkampani zobuchwepheshe. Siyazi ukuthi abantu abaningi bayazithanda izinkampani zobuchwepheshe ezisafufusa, samangala ngenkathi kumenyezwa igama lethu,” kusho yena.

UNks uNonjinge uthi ukunqoba lo mklomelo kubajabulisile ngoba imali abayitholile izobasiza ngezindlela eziningi.

Uthi bakhuthazwa wukuphokophela ukwenzela abantu besifazane indawo ephephile lapho bekwazi ukukhuluma bakhululeke ngezinwele zabo nangezinkinga ababhekana nazo nsuku zonke. Banezisebenzi ezine.

Ibhizinisi liselisha, lisadlula ezingqinambeni eziningi. “Inselelo enkulu wukucishwa kukagesi. “Loku kunomphumela omubi ebhizinisini lethu ngoba uma singenawo ugesi asisebenzi, besingakayitholi nendlela yokulungisa le nkinga ngoba asikwazi ukuthenga i-generator.

“Sinenkinga yendawo futhi. Kufika nabantu abaningi, okuba inkinga ngoba asinayo imishini eyanele. Nekhona iyafa; kumele kuthengwe enye,” kusho yena.

UNks uNonjinge uthi babefisa nokuthuthukisa amakhono ezisebenzi zabo kodwa bebehluleka ukwenza loko ngenxa yokuswela imali. “Njalo uma sizwa ngezigcawu zokucobelela ulwazi eKapa, sithumela izisebenzi zethu khona.”

Uthi imali nokwehlisa umthwalo wokulawula emabhizinisini kungalekelela izinkampani ezinjengeyabo zikwazi ukukhula. “Kunzima ukuthola imali kuhulumeni nasezikhungweni ezizimele, imali etholwa amabhizinisi amancane emcimbini yezindondo enjengalona iyasiza ekuvaleni lelo gebe lokungatholakali kwemali.”

• Lolu daba luqale lwashicilelwa ku: www.vutivibusiness.co.za