Amabhizinisi asemalokishini ahlomule ngamadela angomahambanendlwana. UTEBOGO MOKWENA uyabika.
UNGQONGQOSHE wokuThuthukisa uMphakathi, ezoLimo, ukuThuthukisa iziNdawo zasemaKhaya neMvelo eGauteng uNks uMbali Hlophe wethule amadela awomahambanendlwana ayishumi.
Inhloso yawo wukuhlinzeka amabhizinisi amancane asemalokishini akhiqiza inyama ngezindawo zokuhlinzela ukuze lo mkhakha uthuthuke. La madela athulwe eMoroka Chickens ese-Ironsyde, eDe Deur, eMidvaal, elinye lamabhizinisi azohlomula kulolu hlelo.
Ngokusho kukaNks uHlophe, izindawo zokuhlinzela eziyisishiyagalombili zibekelwe ukusebenza ngenyama yenkukhu besekuthi ezimbili ezenyama ebomvu. Umnyango ukhokhe uR22.6 million ngendawo yokuhlinza izinkukhu, kwathi ezenyama ebomvu zabiza uR21.8m indawo iyinye.
Indawo yokuhlinzela izinkukhu eyodwa kungahlinzelwe kuyona izinkukhu eziwu-2 000 ngosuku, ezenyama ebomvu kungahlinzelwa izinkomo eziyisithupha ngosuku kuzona.
Abahlomulile kulolu hlelo sebezitholile izitifiketi zokusebenza.
UNks uHlophe uthe abafuyi abaseduzane sebezokwazi ukuhlinza imfuyo yabo ngaphandle kokusebenzisa imali enkulu behamba amabanga amade beya emadeleni. Wengeze ngokuthi la madela angomahambanendlwana azoqinisekisa ukuthi abahlomula ohlelweni lokuthuthukisa abalimi bahlinzekwa ngezinsiza zokufuya izinkukhu, bayakwazi ukufinyelela emadeleni agunyaziwe ukuthi asebenze.
Amadela azokhuthaza abafuyi abancane ukuthi banciphise ukuhlinza okungekho emthethweni kwezinkukhu nezinye izilwane. Uthe: “Abalimi abancane abaningi nabenza imikhiqizo bajwayele ukubhekana nobunzima uma befuna ukufinyelela ezimakethe ukuze badayise imikhiqizo yabo eGoli nasezweni lonke.
“Banqindwa wukukhiqiza imikhiqizo enganele, ukungabi nolwazi olucacisa ukuthi imakethe idingani, izindawo zabo ezikude, izindleko eziphezulu zokuthutha, ulwazi lobuchwepheshe olungenele nokungabi namakhono ebhizinisi anele… Akufanele ngabe abalimi abancane nabenza izinto ngemikhiqizo yezolimo bathwala kanzima uma befuna ukufinyelela emakethe, ikakhulu laba abasebenzela emalokishini,” kusho uNks uHlophe.
Ungqongqoshe ukhuthaze abafuyi abancane ukuthi baqale bezibandakanye nezinye izingxenye zezolimo bangagcini ngezinto abazenzayo.
“Izinhlelo zokudla zesimanje zenze kubenzima ukuthi abalimi abancane baqhubeke basebenze, ekubeni zingenye yezindlela ezinhle zokuphuma ebubheni. Umnyango ukwazi kahle loku futhi ngenxa yaloku uqale izimakethe zabalimi emalokishini ahlukene ukuze abalimi abehlukene, abakhiqizi nezinhlaka ezithinteka kulolu hlobo lwebhizinisi bakwazi ukufinyelela kalula ezimakethe,” kusho uNks uHlophe.
- Lolu daba luqale lwashicilelwa ku: www.vutivibusiness.co.za
