PM Wrap I-Transnet neMcKinsey & Company bamemezele ukuthi sebesiphothulile isivumelwano semali iMcKinsy eyazibophezela ukuyibuyisela iTransnet kwiJudicial Commission of Inquiry ngoDisemba wango-2020. Kule mali ewu-R870 million kunemali eyakhokhelwa iMcKinsey ngomsebenzi weRegiments Capital nenzalo. May 25, 2021 Share this now
PM Wrap I-RESOURCE Generation imemezele ukuthi uDkt uKonji Sebati obengomunye wabaqondisi bebhodi layo ushonile. UDkt uSebati, osebenze nezinkampani ezinkulu zezempilo emhlabeni, uke waba yinxusa leNingizimu Afrika eSwitzerland naseFrance. May 21, 2021 Share this now
PM Wrap I-TIGER Brands imemezele ukuthi imali engenile inyuke ngo-8% yafinyelela kuR16.4 billion ezinyangeni eziyisithupha eziphele mhla ka-31 kuMashi. Inzuzo engenile inyuke ngo-21% yafinyelela ku-741 cents isheya. May 21, 2021 Share this now
PM Wrap I-TOYOTA Financial Services yaseNingizimu Afrika isiqoke uNkk uSindisiwe Mabaso-Koyana njengelungu elisha lebhodi yalo. UNkk Mabaso-Koyana uqokelwe nasekomitini elibhekele ukucwaninga amabhuku. May 21, 2021 Share this now
PM Wrap ABAPHISI bewayini iDistell bamemezele ukuthi bashelwa yinkampani kabhiya iHeineken efisa ukuthenga isabelo esikhulu sebhizinisi labo. Bazise labo abanamasheya enkampanini ukuthi kunezingxoxo ezikhona okungenzeka uma seziphothuliwe zithinte inani lamasheya. May 21, 2021 Share this now
PM Wrap IBHANGE loMbuso aliyishintshanga imalimboleko ngenkathi limemezela ukuthi isazoqhubeka ibe wu-3.5%. Umphathi waleli bhange uMnu uLesetja Kganyago uthe balindele ukuthi amandla emali asazoba kuleli zinga akulona ngo-2021. Uthe sebekubuyekezile ukukhula komnotho, wathi balindele ukhule ngo-4.2% esikhundleni sika-3.8% ababewushilo ngoMashi. May 21, 2021 Share this now
PM Wrap UNgqongqoshe wezeziMali uMnu uTito Mboweni, ngokwamagunya anawo, useqoke uMnu u-Unathi Kamlana ukuthi abe wuKhomishana weFinancial Sector Conduct Authority. UKamlana uyinHloko yomNyango we-Policy, Statistics and Industry Support ePrudential Authority eBhange loMbuso. Izintambo uzoziphatha iminyaka emihlanu kanti kulindeleke ukuthi aqale mhla ka-1 kuJuni 2021. April 22, 2021 Share this now
PM Wrap UMNYANGO wezeziMali neBhange loMbuso sebezichithile izinsolo ezenziwe wuMnu uTokyo Sexwale othe kunezigidigidi zemali ezanikelelwa iNingizimu Afrika ukuze zilekelele umphakathi kodwa esezinyamalele. USexwale uthe lezi zizumbulu zafakwa ebhange lombuso ngoba zanikelwa ziqhamuka phesheya. UmNyango wezeziMali neBhange loMbuso bathe sebake bamchazela uSexwale ukuthi loku yinto engekho kanti bacabanga ukuthi yimizamo yokuqola abantu. Bathe uSexwale akayena umuntu wokuqala odumile oseke wabuza ngale mali-mbumbulu. April 20, 2021 Share this now
PM Wrap I-EXXARO isiqoke uMnu uGeoffrey Qhena ebhodini layo kanti futhi kulindeleke ukuthi athathe izintambo njengosihlalo walo. UQhena unamava okuphatha izinkampani ezimbonini ezihlukene njengoba eke wasebenza eKPMG, kwa-Eskom, e-University of Johannesburg, eTransnet nase-IDC. April 20, 2021 Share this now
PM Wrap I-ABSA isiqoke uMnu uJason Quinn njengebamba lesikhulu esiphezulu ngemva kokushiya kukaMnu uDaniel Mminele. Leli bhange lithe uMminele uzogcina ekupheleni kuka-Ephreli ngemva kokungaboni ngaso linye ngomkhombandlela okumele ulandelwe nangezindaba ezithinta uguquko endleleni okwenziwa ngayo izinto kule nkampani. April 20, 2021 Share this now
PM Wrap Ngemva kokubonisana nomNyango wezeziMali, iBhange loMbuso neBank Association of South Africa bavumelene ngokwelula isikhathi seLoan Guarantee Scheme (iLGS) izinyanga ezintathu kuze kube mhla ka-7 kuJulayi 2020. I-LGS yamenyezelwa wuMengameli uMnu uCyril Ramaphosa mhla ka-21 ku-Ephreli 2021 ngokohlelo lokuzama ukuvuselela umnotho i-Economic Stimulus Package ngenhloso yokweseka amabhizinisi amancane ayebhekene nobunzima ngenxa yomphumela weCOVID-19. Kuze kube manje amabhenki aseboleke amabhizinisi awu-14 827 imali ewuR18,16 billion. Nokho lolu hlelo alubanga yimpumelelo njengoba bekuhleliwe njengoba izinkampani eziningi ezishayekile zingabanga nkamunkamu ukuboleka imali ngenxa yokwesaba ukucwila ezikweletini. Ukululwa kohlelo lokubolekisa kuzokwenza ukuthi kusongwe izinto ngendlela. Lolu hlelo luzokwenza ukuthi kubolekwe bonke abafaka izicelo kusukela esikhathini sokwelulwa kwalo kuye kuze kuphele iminyaka emihlanu. April 12, 2021 Share this now
PM Wrap I-DISCOVERY Bank isimemezele ukuthi isiqoke uqweqwe lukasomabhizinisi uDkt uReuel Khoza njengosihlalo wayo kusukela mhla ka-1 ku-Ephreli. Kusukela leli bhange lasungulwa usihlalo walo bekuwuMnu u-Adrian Gore, isikhulu esiphezulu seDiscovery Group, engabanikazi baleli bhange. April 1, 2021 Share this now
PM Wrap OQONDENE nokusongwa kwezindaba zebhange elawa iVBS Mutual Bank, uMnu u-Anoosh Rooplal, ukhumbuze ababenemali efinyelela kuR100 000 kuleli bhange ukuthi bangayikhipha imali yabo eNedbank kuze kube mhla ka-8 kuJulayi. Lolu yilona suku okuzophela ngalo lesi sivumelwano esesineminyaka emithathu phakathi kukaRooplal, iPrudential Authority neNedbank. Kuma-akhawunti awu-18 300, awu-17 750 enani likaR260 million athuthelwa eNedbank, kanti u-98% wabantu usuwayilanda imali yawo. Kukhona awu-3 773 abantu ababenemali ewuR100 nangaphansi avalwa ngenxa yezindleko. Isiyonke imali kulama akhawunti yayiwuR105 000 kodwa nabanikazi bawo banelungelo lokuyifuna imali yabo kuze kube mhla ka-8 kuJulayi 8. Kusanda kuthuthelwa amanye ama-akhawunti awu-370 anoR3.7 million. April 1, 2021 Share this now
PM Wrap UMNYANGO wezeziMali eNingizimu Afrika usumemezele ukuthi usuqoke izinkampani ezine zokuxhumana ukuthi zihlinzeke izinhlaka zikahulumeni nge-data nangamaselula. Le nkontileka yeminyaka emihlanu eqale mhla ka-1 Ephreli inikezwe iCell C, iMTN, iTelkom neVodacom. Phambilini le nkontileka yayinikezwe iVodcom kuphela. April 1, 2021 Share this now