Kuzobhungwa ngezixazululo zobuchwepheshe e-Afrika emabhizinisini asafufusa. INTATHELI YOMBELE iyabika

ABAHOLI nongoti bezobuchwepheshe emhlabeni bazobuthana ukuzogubha iminyaka ewu-25 kwasungulwa i-Africa Tech Festival eCape Town International Convention Centre phakathi komhla ka-7 no-11 Novemba 2022.
Iziko lakho lezindaba zamabhizinisi Umbele ngelinye lezinkampani eziyingxenye yalo mcimbi ohlelwa yinkampani yezobuchwepheshe ezinze eLondon i-Informa Tech. Leli ziko lizokulethela izindaba zishisa ngokuzokwenzeka kule ngqungquthela.
Kule ngqungquthela kubhungwa ngezinto ezintsha kwezobuchwepheshe nemizamo yokuletha uguquko yizinkampani ezisekhaleni lalolu shintsho e-Afrika. Kuzoba wumbuthano we-Africa Tech Festival wokuqala bukhoma ngemva kokubheduka kweCOVID-19.
Phakathi kwezihloko ezizodingidwa kukhona ezizobheka ukuthi iyiphi indlela engasetshenziswa ukuvala igebe ukulungiselela abantu base-Afrika ukuthi babenamakhono adingekayo ngomuso, ubuchwepheshe besimanje bungasiza kanjani ukubhekana nenselelo yokuguquguquka kwesimo sezulu, ukulekelela izinkampani ezisafufusa ukuze zibe seqhulwini ukuletha ushintsho oluhambisana nobuchwepheshe nokusiza abalimi abasafufusa ukukhulisa umsebenzi wabo ngobuchwepheshe.
Phakathi kwezikhulumi kukhona i-chief technology officer eVodacom uMnu uDejan Kastelic, isikhulu esiphezulu seGoogle eSub-Saharan Africa uMnu uNini Gajria, usihlalo webhodi leMassmart uMnu uKuseni Dlamini, isikhulu seBCX esibheke izimayini, izimboni nezempilo uNks uNthabeleng Digangoane, isikhulu esiphezulu seFNB Connect uMnu uBradwin Roper nesikhulu esiphezulu se-Africa Digital Development Advisory uNks uShamira Ahmed.
Ukubheka uhlelo lonke, ungangena ku: https://tmt.knect365.com/africa-tech-festival/2022-agenda/.
Kuzoba khona nombukiso kwabafisa ukukhangisa ngemisebenzi yabo. Kulo nyaka azobe ekhona futhi ama-Africa Tech Festival Awards. Le miklomelo ngeyabantu abaqhamuka nezinto ezintsha nabazama ukuletha uguquko kwezobuchwepheshe ukufaka wonke umuntu.
Uma ufuna ukwazi kabanzi ngale miklomelo, ungangena: https://tmt.knect365.com/africa-tech-festival/awards/ Ukubhalisa nokuthola amathikithi ale ngqungquthela, ungangena ku: https://tmt.knect365.com/africa-tech-festival/registration-tickets/