IBHANGE loMbuso linyuse imalimboleko ngo-75 basis points yafinyelela ku-7% kulo nyaka. Leli bhange lithe izinselelo zamanani okudla aqongayo, amanani kawoyela nawo asho phezulu, ukwehla kwamandla erandi lisalindele ukuthi ziqhubeke.

IYAQHUBEKA imizamo yeTransnet yokulwa nezigebengu ezintshontsha izintambo zojantshi bezitimela. Kuleli sonto amaphoyisa aseSasolburg, eFree State, abophe abasolwa abayisithupha abebephethe izintambo zikajantshi ezintshontshiwe zenani elinguR750 000. Emasontweni amabili edlule sekutholakale izintambo ezebiwe zenani elinguR3.4 million.

I-CLICKS izothenga iSobert, inkampani yezimonyo nezindawo zokubhucabhuca umzimba, ngoR105m. Kusukela ngo-2015 iClicks ibinamasheya awu-25% kule nkampani ebesekungeye-Old Mutual Private Equity. Imikhiqizo yeSorbet ivele iyatholakala ezitolo zaseClicks.

I-LIBERTY Two Degrees iqoke uNks uNonhlanhla Mayisela, uNks u-Itumeleng Dlamini noNkk uPhilisiwe Mthethwa ukuthi babengamalungu amasha ebhodi labaqondisi bayo.

I-TELKOM ithi usihlalo wayo uMnu uSello Moloko uzoshiya kulesi sikhundla ngonyaka ozayo. Ithe izobuye imemezele kahle ukuthi uzogcina nini kodwa akufanele kuze kuphele uMashi engahambile.

Izinkampani ezishicilele imibiko yezimali kuleli sonto yi-eMedia, iSouthern Sun, iMr Price Group, iStefanutti Stocks, iTsogo Sun Gaming, iLewis Group, i-African Media Entertainment neTelkom.

UQWEQWE lomholi wamabhizinisi uMnu uMteto Nyati luthenge u-40% wenkampani yobuchwepheshe iBSG. UNyati, owumsunguli weWazo Investments, uwusihlalo weBSG.

I-TIGER Brands iqoke uMnu uNkosodumo Mfini ukuthi abe yisikhulu esiphezulu sophiko lwe-cereal. UMfini uyi-chartered accountant kanti uneminyaka eyisithupha esebenzela le nkampani eyenza ukudla. Useke wasebenza ePepsi naseSappi.

I-TRANSNET income isinqumo seNkantolo yeMantshi yaseBelfast egwebe izigebengu ezintathu iminyaka ewu-15. Lezi zigebengu zitholwe zinecala lokuntshontsha izintambo zikajantshi eWonderfontein, eMpumalanga.

ABALAWULI bemboni yezimali iFinancial Sector Conduct Authority (iFSCA) baxwayisa abantu ukuthi baqaphele uma besebenzisana nenkampani iMiWay Team Mining abathi ihlinzeka ngosizo lwemali ingagunyaziwe. I-FSCA ithe ngokolwazi enalo iTeam Mining ithi isebenzisana ne-EasyEquities, inkampani esemthethweni nenegunya lokuhlinzeka ngemali kodwa okungelona iqiniso. I-FSCA igcizelele ukuthi iTeam Mining ayihlanganise lutho nenkampani yomshwalense iMiWay.

EZINYE zezinkampani ezishicilele imibiko yezimali kuleli sonto yiVodacom, i-Investec neSpar.

IDOLOBHA laseThekwini liqokwe njengelihamba phambili ekwenzeni imihlangano nezingqungquthela e-Afrika kuma-2022 World Travel Awards. Ungqongqoshe wezokuThuthukiswa koMnotho nezokuVakasha KwaZulu-Natali uMnu uSiboniso Duma ulibongele iTheku, wathi namaholidi kaKhisimuzi aseseduze bawabheke ngabomvu.

I-TRANSNET isiqalile ukuzama ukukhathula umsebenzi obumile ngesikhathi kade izisebenzi zitelekile izinsuku eziwu-12. Le nkampani yezokuthutha kahulumeni ithe ziphakathi kuka-70% no-80% izisebenzi esezibuyele emsebenzini futhi ilindele ukuthi nezinye zibuye.

UNks uLeanne Jackson useqokwe wawumehluleli omkhulu womKhandlu wabeHluleli embonini yezimali. Uzothatha izintambo kusukela mhla ka-1 ngoNovemba kanti lesi sikhundla eseminyaka emihlanu. UNks uJackson unamava emkhakheni wezimali kuhulumeni nasezinkampanini ezizimele.

I-MTN ithe azisaqhubeki izingxoxo phakathi kwayo neTelkom ngoba abakwazanga ukuvumelana ngemigomo nemibandela yokudayiselana amasheya.

UPHIKO olwengamele ukudayisa utshwala iKwaZulu-Natal Liquor Authority iyimisile ilayisensi yokudayisa utshwala endaweni yokubumnandi i-Artizen Restaurant and Lounge emva kokufa komuntu oyedwa kade kudutshulwana. Lolu phiko luthe abanikazi bale ndawo abayilandelanga imiyalelo yokuba nale layisensi.