Uhamba ezinyathelweni zikayisemkhulu osenebhizinisi lokufuya izinkukhu zekhethelo. Uxoxe noNQOBILE NDLOVU
ZIMBILI izinto eziholele umfuyi wezinkukhu nomlimi waseningizimu yaseThekwini kwezolimo – uyisemkhulu ongasekho nendawo adabuka kuyona.
UMnu uLinda Khanyile ukhule uyisemkhulu enomhlambi wezinkukhu zesiZulu. Yileli fa laphakade ingwevu eyalishiyela umndeni. Ngeshwa ngokuhamba kwekhehla bakhohlwa wukunakekela lezi zinkukhu zekhethelo, lashabalala kanjalo ibhizinisi lekhehla.
Njengeningi lontanga yakhe uKhanyile wakhula ezibona enza umsebenzi wezicwicwicwi kwathi ngemva kokuqeda uMatikuletsheni wabhalisela i-Bachelor of Arts in Communication Science e-University of South Africa. Wenza iminyaka emibili e-Unisa, kwase kuvela isimo esamphoqa ukuthi ashiye phansi izifundo ayosebenza.
Ngo-2020 ngemva kokubheduka kobhubhane iCOVID-19, wadilizwa emsebenzini. Lo mshophi owamehlela wamkhuthaza aqhamuke nesu lokuziphilisa. Wakhumbula ukuthi ukutshala yinto esegazini kuyena. Wasebenzisa imali ayeyibeka nyanga zonke ukuqala ibhizinisi lezolimo lamaveji amazambane, ispinashi, u-green pepper nopelepele.
Ngokuqhubeka kwesikhathi wengeze izinkukhu eziphilayo nezihlinziwe eMjiks’s Fresh Chicken. UMjiks ususelwa esidlalisweni sikaKhanyile “uJoko”.
Uthi wabona ukuthi ibhizinisi lakhe lizoba impumelelo ngenxa yokubiza kwezinto zokuhamba. UthI: “Abantu bangakathi babenokusuka eSiphingo, ngase ngibona isidingo sokubasondezela imnyama yenkukhu eLovu.”
Inkukhu ephilayo ibiza uR100 kuthi echuthiwe ibe wuR110.
Ngenxa yebhizi yaseMjiks’s Fresh Chicken, uKhanyile usenabantu abayisishiyagalombili abamsizayo emsebenzini.
Nakuba umsebenzi umchuma kodwa uKhanyile ukhala kakhulu ngokucima kukagesi, “i-load shedding ililimaza kakhulu ibhizinisi, ikakhulukazi ebusika. Amachwane adinga ugesi kakhulu, manje uma kubanda bese kuphela ugesi, ungagcina (ushona) ngenxa yokuphela kukagesi, yingakho izinkukhu ngagcina ngizithengela i-generator.
“Kumnandi khona ukuziphatha uziqhubele ibhizinisi lakho kodwa kunazo izinselelo. Ngaphandle nje kwalezi esengizibalile, kuyenzeka ngivuke ezinye izinkukhu sezifile, kokunye izisebenzi uzilindele ukuthi zifike kodwa zingafiki,” kusho yena.
Isifiso sikaKhanyile wukubona iMjiks’s Fresh Chicken isidlondlobale yaze yagcina isihlinzeka izindawo zokudla nezindawo zikahulumeni njengezibhedlela namajele.
Facebook: Lindelani Khanyile
Instagram: lindelani.khanyile.56211
Twitter: @Lindela55481356
